|
題 目：甘心成為主的小驢駒
講 員：余心玫同學、講稿整理：余心玫同學 聖經節：馬可福音11章1～10節 語音檔下載 兄弟姊妹，咱今仔日欲作夥來思考一段經文，是講起主耶穌欲入耶路撒冷城的故事。耶穌騎驢仔進入耶路撒冷城，百姓歡喜迎接祂，當做是欲復興國家的君王來臨，所以大家去田園，剉樹枝，來鋪佇路裡，還脫自己的外衫來鋪。民眾喊喝「和散那！」的聲真響亮。充滿熱情與盼望。這是盼望的遊行，欲掙脫暴政的百姓，大聲在呼叫。 這是民眾自發自動的行動，一場反抗羅馬當局的遊行。親像今年年初佇突尼西亞、埃及、利比亞、葉門、巴林等等所在，聚集的群眾心內充滿期待與盼望，盼望in的國家會改變，人民會出頭天。 在人看來無可能的事，在上帝欲成做可能！ 民眾的盼望需要有一個焦點，需要有一個記號。當耶穌進入耶路撒冷，祂用一個街頭的「行動劇」，成為民眾的焦點與盼望的記號：祂騎佇一隻驢仔頂。有認真讀聖經的百姓，藉著此隻驢仔，認出耶穌就是先知撒迦利亞所講的，彼位騎佇驢仔頂的和平人君：「看啊，你的王來就近你；伊是公義還行拯救，溫柔，還騎驢及驢所生的驢駒。」（撒9:9b） 咱今仔日就是欲將眼光集中佇此隻驢仔，來思考咱佇上帝國的盼望中，所扮演的角色。牠毋是高強大漢的戰馬，無穿鐵甲，無用絲綢與金銀來裝飾，牠無蹛佇皇家的馬廄，只是互人綁佇路邊，彎角仔的所在。祂無經驗、無戰功、無名聲。總是，耶穌騎牠進入耶路撒冷，牠變成做宣揚上帝國盼望的工具。 在人看來無可能的事，在上帝欲成做可能！ 一、咱也攏有可能是在路邊等待的平凡小隻驢仔 福音書詳細記載這場遊行的過程。它的起頭，是先由尋一隻小小隻的驢仔開始。門徒受差，去為耶穌尋一隻驢仔。它是綁佇路邊，真正平凡的驢仔，猶未互人騎過，無去過城市，無見過大群的民眾的聚集。總是耶穌就是欲用牠，而且耶穌真詳細來吩咐門徒著安怎做，互他們完全無疑問，知道他們欲尋的，就是彼隻驢。 所以，咱知第一項，就是當上帝國的盼望成做人民的勇氣的時，耶穌嘛會安呢清楚來召祂所定著的人，來互祂使用。 二、解開束縛，進入使命 門徒確實照所吩咐的，找到耶穌所講的彼隻驢仔。他們解開牠，將牠帶離開祂所站的所在，離開牠的主人。主人當然感覺奇怪，問他們解他的驢欲做啥？門徒回答：「主欠用牠！」主欲來用牠，喚醒人對先知所講的拯救者的形像的記憶，重新得到盼望與勇氣。驢仔的主人肯借驢仔互耶穌，可能是有認識耶穌與祂的使命。 所以，受呼召的，毋若是此隻驢仔本身，驢仔的主人嘛受到邀請，著肯放他的驢仔去實踐使命。受召投入上帝國的事工的人，就是安呢，著暫時離開一直養飼、保護伊的家庭、團體、安穩熟識的環境，一直疼伊、保護伊的家庭，嘛著願意接受伊受解開、受帶離開他們。因為：主欠用牠！ 三、驢仔受裝備 當門徒將小驢仔帶到耶穌面頭前的時，他們先做一項代誌，就是將他們自己的外衫脫落來，鋪佇驢仔頂，互耶穌會當來坐。咱會當將門徒的外衫看做是一款能力、權柄的像徵。好親像以利沙繼承以利亞的外衫，是繼承他先知的能力與權柄。門徒也用他們跟隨耶穌以來所領受的一切恩典與氣力，來裝備此隻驢仔。 有一寡信仰的前輩讀此段聖經，攏會感覺自己就是此隻驢仔，嘛甘願做一隻互耶穌基督來使用的驢。真正佇生命中感受到基督的召命，歡喜來跟隨祂的人，真正好比此隻驢仔，雖然無經驗、無見過世面，只不過靜靜站佇路邊。但是主早就認出牠、欲使用牠。 主欲用咱！祂揀召咱，祂的門徒知咱的卑微、無夠額，就用他們所曾領受的恩典、氣力、能力、知識的衫，來遮蓋咱本來真粗、硬的皮毛，互咱成做主所合用的。 親愛的兄弟姊妹，咱攏會親像一隻小小的驢仔，忽然間，主會對咱講：我欲用你！人可能無重視咱，因為咱是無力的。佇茫茫的社會中，咱無地位名聲，無人看見，無人用咱。總是，主看見咱、欲用咱，咱受解開，離開原來的主人，得著祂的邀請，咱做夥入城，開始將上帝國的盼望傳揚出去。 四、結論 親愛的兄弟姊妹：今仔日是台南神學院紀念主日。神學院是主所欠用的小隻驢仔受解開、受牽到主面前、受裝備的所在。當上帝國的盼望佇咱此個世代在遊行，群眾欲來就近彌賽亞的時，阮願意親像一隻無名聲、無好看，總是甘願互主來用的小隻驢仔，與咱的主耶穌共一個心志，用謙卑來服事。願咱教會用代禱與奉獻，幫助此隻小驢仔裝備自己，願咱繼續佇祈禱中互相紀念。 |